الاعلامية وسام خاطر فى عتاب رقيق و رسالة حب لبعض النساء

حضرتك ! من فضلك ؟

أنتي أيوه أنتي ليه خايفة وقلقانة من شكلك ؟

سمينة  شوية، قلبوظة حبتين.

طب وأيه يعني. ممكن برده تهتمي بنفسك وشكلك وشياكتك.

ألبسي لبس لايق عليكي. ويظهر جمالك.

مش شرط يكون علي الموضة المهم يناسب شكل جسمك.

ماهو مش كل الموضة بتناسبنا.

ولا أقولك ماتيجي تغيري طريقة حياتك؟!

أه غيري طريقة حياتك. ظبطي أكلك بلاش الأكل المليان سمنة والرز والمكرونة والعيش.

كلي بس بشويش علي نفسك.

أشربي ميه قبل الأكل علي الأقل وجبتك هاتهضم بسرعة.

كتري من الفاكهة والخضروات. أمشي شوية كل يوم.

علي فكرة لو أنتي ماهتمتيش ممكن ماتلقيش أللي يهتم وساعتها هاتخسري نفسك.

لما بتحافظي علي صحتك مش شرط علشان خاطر شخص بعينه لأن الشخص ده ممكن يختفي أو يبعد في أي وقت

بس أنتي أللي هاتفضلي مع نفسك. يعني مش هاتتفرقوا.

طب ليه ما تخديش بالك منها وتراعيها. أيوه تراعيها.

علي فكرة هي ليها حق عليكي وكمان أكتر حد بتظليمه. يبقي يافندم لازم تراضيها.

خليها تعيش بلا أوجاع، تفرح وتتبسط بشكلها وعقلها وكل حياتها.

طبطبي علي نفسك لأنك أولي حد ممكن يكون حنين عليكي.

ليه بتضيعي فرصة تلبسي فيها فستان لطيف، أو تجري مثلاً مع أصحابك،

أو تطلعي السلم وتستغني عن الأسانسير.

يا هانم حضرتك ملكة والملكات مفيهومش غلطة.

معلش غلست عليكي طب ضايقتك بكلامي.

أصل بصراحة انا بحبك ومش بحب أشوفك متضايقة.

قولت أدردش شوية واكلمك. بس أوعديني تخلي بالك منك.