ساويرس عبقرية الزمان والمكان الله يعمر بيت أبوه ” رؤيته نحو حل أزمة الدولار “

بقلم / خالد الترامسي
بالأمس البرنس نجيب سويرس بَدَعْ في إتصال هاتفي مع عمرو أديب في القاهرة اليوم وقال كلام يا خبر الرجل ده عَلامَة ، نابغة ، فلتة زمانه ، الرجل كل شوية يطلع يقولنا علي روشتة زي الفل ياااااااااااااه لو خدنا بيها دي البلد دي هتبقي زي الفل والورد والياسين وجزيرة الموز إللي في الأقصر ، ياه كلام دورر ، الرجل ده مبيطلعش من بقه ألا الحكم ، حكم إيه ، دا كل كلمة بيقولها إختراع ، دا ممكن يخلي مصر دي أغني دولة في العالم .
عموما ما علينا ، يعني من قلة النوابغ عندنا ، دي مصر مليانة نوابغ ومتحزلقين ومتفرطشين ، وطرشي ، طرشي حادق وطرشي دلع وطرشي ماسخ ، أه الطرشي بتاع المجاري ، المهم أنا هسيبكوا تحكموا علي فلتات هذا الرجل وإختراعاته اللولبية والله تنفع تتعمل ” لولب ” ونوفر العملة الصعبة في شرا لوالب من برة ونوفر الدولارت إللي عمله لنا كارلوا في دماغنا ، تخيلوا الرجل ده شايف أزمة الدولار إزاي ، طيب الرجل بيقول “أزمة الدولار هتتحل إزاى؟..والسياحة مش هترجع يبقى على الأقل نرجع الاستثمارات الأجنبية، وبنقعد نسمع عن استثمارات بالمليارات لكنها كلها فى الإعلام، لو الاستثمارات دى دخلت مصر فعلاً هتخش على الدولار تجيبه الأرض..فضلاً على أننى غير مؤيد لأننا فى معركة مع الدولار، ما يطلع أو ينزل مش هيضرنا، لأن البنزين لا بيتاثر ولا رغيف العيش، ولا السكر، ولا الفول، لكن اللي بيتاثر العربية اللي كانت بـ 400 ألف اصبحت بـ 500 ألف جنيه، واللى معاه المبالغ دى مش هيفرق معاه الزيادة دى.. فيجب علينا أن لا ننزعج من أزمة الدولار” يا حلاوتك نجيب باشا إية الطعامة دي ، الله يرحمك يا عم سعيد يا صالح ، كانت طلباك دلوقتي والله ، الرجل ده ” أقصد ساويرس ” رجل زي الفل والله مجبتوش ولادة .
طيب يا عم الحاج لما نزود الإستثمارات وندخل إستثمارات جديدة هنجيب الدولار لمس أكتاف ، طيب بسلامتك صفيت موبنيل ليه ؟! هي مش إتحولت لأورانج؟! ، طيب إنت قاعد في مدغشقر ولا كوالالمبور دلوقتي ليه ؟! يا أخي إذا بوليتم فاستتروا ، إستثمارات إيه إللي هنجيبها من برة وإنت بتخربها قصدي تخرجها .
وبعدين ممكن يكون معاليك فعلاً معندكش أزمة في الدولار ، يا كبير دا إنت لوحدك معاك بس سيولة في البنوك يجي ٧٠ مليار دولار وكل واحد من إخواتك معاه زيهم وأبوك أكيد بقي الكوتش الكبير تلاقي معاه أضعافكوا دا غير الأصول طبعاً ، إللي هي أضعاف السيولة بحكم الواقع والمنطق الإقتصادي ، دا إنتوا ممكن تصرفوا علي مصر يجي ٧٠ سنة جاية ، اللهم لا ” حسد ” وتقولي يطلع ولا ينزل ” الدولار يعني” مش هيضرنا في شيئ ، لا يا جميل دي مصر تنضر ونص ، وتتمسخر كمان بنزين إيه ولا سكر وعيش وفول هي مبتأثر علي الحاجات دي علي الرغم إن الدولة بتستورد أزيد من ٧٠ % من إحتياجاتها من هذه الأمور ، وغير كدة الدولار بنشتري بيه لبن الأطفال المدعم ” اللي بيجيب أمراض” واللي مش مدعم ودي حاجات بنجيبها يا عم ساويرس بالدولار ، دا بالإضافة للتفاح والكمترة والموز والبطيخ ، يعني لو الولية أتوحمت علي بطيخ في الشتا أعمل إيه أسيب الواد ولا البنت يطلع في وشه ولا وشها بطيخة ، مينفعش الكلام ده يا سوسو ، كله كله وموضوع العربيات ده كوم تاني ، مهو يا كبير العربية أم ٤٠٠ ألف اللي بقت ٥٠٠ مش هتفرق مع الناس اللي زيك إللي بيجبوها هدايا لأحفادهم ، ولاهدايا للنساء الفضليات إللي من باب البيت للجامع ، ومن باب الكنيسة للبيت .
وانبي خليكوا في حالكوا البلد مش ناقصة عت،،،،،، ” عتاب ” يعني ، إنصحوا أنفسكم،، طيب سلف الدولة المصرية كام دولار ، ولا تسلفها ليه ، كنت غضيت الطرف عن موضوع الضرايب إياها وقمت بأدائها .
سلام يا كبير ، أسلملك علي مصر ؟! هي مش وحشتك !!!، طيب إنتي موحشتناش .