شعر: نادية البسيونى
استغربتك
لما لقيتك بتقولهالى
بتحبينى يا نور أحلامى
وانت الأدرى بدقة قلبى
لما تقولك انت الغالى
ده اللى مابيننا يا نور أيامى
إحساس تانى
فيه الطير يحلاله يرفرف فوق أغصانى
فيه الشمس بضى نهارى
تغزل ثوبها بلون أزهارى
فيه البحر بموجه يلالى
وبيحلالى
لما ياخدنى وسط نجوم الليل يا هلالى
فيه أنهارى الصافية تعدى
وسط جبال الروح لو دارى
ليه تقولهالى
وانت الدنيا اللى محاوطانى
طمن نفسك
مهما تتوه عن روحك تانى
فين ما تروح جواك تلقانى
