صعايدة على حق ولا يهمهم
ما يضيع الحق عمره عندهم
والكلمة عندهم زي السيف والوعد
والسيف حاد والوعد لازم يتحقق
أحرار ووعد الحر دين عليه
واصلهم وطبعهم زي دينهم
لا يهون عليهم ولا فيه تفريط
عبادة وصلاة والدعوة لله
ولغير الله عندهم الدعوة مزله
وعشان كده لا بيقبلوا إهانة ولا مزله
ولا حد فيهم ممكن يطاطي
دايما الرأس مرفوعة
والكلمة من الكل مسموعه
في الشدة والضيق صامدين
لا ينحني ليهم عود ولا قامه
كلهم قوة وشهامه وكرامه
حزنهم صعب اوى وبيطول
لكنه في وسط ولاد العم
بيهون ولا ممكن يطول
وفرحهم من القلب بيكون
لا نفاق ولا رياء بيكون
وشوش سمرة الملامح
أستاذ كان أو فلاح كادح
مشاعرهم دافيه بدفء الشمس
وعندهم حنيه تملأ عيون الشمس
بساطة وتواضع تلاقيهم
رجولة وجدعنه تلاقيهم
والكرم كله تلاقيه عنديهم
يرحبوا بالضيف وكأنه ملاك
على الكفوف متشال قاعد ع راحته
ويا بختك يا إلى تكون عندهم ضيف
حر او برد الشتاء عندهم زي الصيف
في الصيف نسايم النيل بترطب
وفي الشتا حضن الجبل عليك بيطبط
تخرج من حضن الجبل تلاقي
حضن النيل عليك بيطبطب ويرطب
من الجبل للنيل انكتبت فيهم مواويل
تتغني بيها الناس جيل من بعد جيل
ويقولوا صعايدة اتخلقنا و حفظنا أخلاقنا
ورثناها عن أجدادنا وهتورثها بعدنا احفادنا
الأرض عندهم زي العرض
لا تهون ولافيها تفريط
الكبير لما يوصي أولاده.
يقول ارضك زي عرضك
ولو في يوم بعت ارضك
يبقى فرطت في عرضك
ومتبقاش راجل وتلبس الطرحة
وتخرج من البلد راجل
في شكل حرمه بطرحه
طرحك لازم يكون
زي طمي النيل الجارف
يشيل إسمك وقدام الناس
يحافظ على إسمك
ويشيلك على اكتافه
لما الزمان عليك يجور
ويرفع رأسك قدام اهلك
وناسك ويكون فخور
خليك جرئ وازرع في ابنك عادات ناسك
لما يكبر يعرف ازاي لغة اهلك وناسك
لا حقه يضيع وسطيهم ولا يتهان
ويبقى زي أبوه راجل لكل زمان
مهو تزرع العود قوى ساقه
تربيه على الغلا يكبر العود ساقه
لا يتكسر ولا ينحني للعود ساقه
أصلي إلى زرع العود برده قوى ساقه
