كتب / عبدالرحمن مؤمن عبدالحليم
أهلا بيكم أعزائى القراء وخاصة كل واحد سنجل وكل سنجلاية موجودة –
موضوع اليوم هتكلم فيه بالعامية وهكتبه أرتجالى زى عادتى فى كتابة المقالات والقصص عشان كلامى يطلع من القلب علطول مع كل زميل وزميلة بيعيشوا حياة السنجل
ياترى أيه الاسباب اللى بتخلى الواحد مش طايق يعيش قصة حب
يمكن بيكون من جرح قديم أو جديد ودا طبعا بيحصل فى مجتمعنا الان كتير يعنى ممكن يكون بسبب مقلب عاطفى حلو – خت على دماغك بالبلدى كدا أما من حبيبك اللى حبيته بجد أو من جنازة قصدى جوازة أتجوزتها أو من حد وقع بينك وبين اللى بتحبه وحد منكم صدق فانتهت العلاقة وأحيانا تلاقى ناس سناجل من يوم ما أتولدت ويقولك من اللى بسمعه ليل ونهار وبشوفه خلينى لوحدى أريح
يعنى مثلا لو دخلت على صفحة واحد او واحدة بالقدر لحد يهمك تلاقيه الصبح كاتب الحالة ( مرتبط أو مرتبطة )
تدخل بالليل بالقدر برده عشان تقوله ربنايسعدك تلاقىه كاتب حالة ( معقدة) عقدتها لييييييييييه بس ايه اللى جرى ومنزل بوستات ( حب ايه اللى أنت جاى تقول عليه ) او ( سنجل وافتخر ) – ( سنجل للابد ) او ( سنجل على ما تفرج)
رغم انك اللى كنت مسمى نفسك فارس الرومانسية وكنت بيقول ان قلبك كله حب وحنية ليه فجاة كتبت حالة معقدة وكاتب أنك شرفت معانا فى موسوعة سنجل العالمية عموما مش مشكلة نورت معانا يا أخ بس ناوى بجد تنور كتير ولا هتنور للابد ولا من أول غمزة عين من أول بنت هتقابلك فى الشارع هكتب حبيبى دائما
وفى بنات بتكتب انا سنجل وتلاقيها ولا سنجل ولا حاجة يا جدع ممكن واحد يقولها أنا سنجل تقوله وانا كماااااان يا سنجل حياتى طب تجى إزاى دى سنجل حياتك فهمينا حضرتك
وفى ناس بتقولك هو راحة للدماغ صراحة لان كل ما تحب اكتر فرصتك فى تعب القلب وفقع المرارة تكتر وتكتر وأسال مجرد
– يعنى مثلا فى بنات كتير بتكتب سنجل وبيكون عندهم حق صراحة خصوصا بعد ما الشباب أضربوا بالرصاص فى قلبهم وأتعمى بعضهم فى الثورة مما تسبب فى أنخفاض نسبة العاطفة خصوصا أن شباب كتير فاهمة الحب غلط خالص – الحب وخاصة الحب اللى قبل الزواج عمره ما كان معناه الشهوة ولا لازم خالص عشان تثبتلك حبها تروح معاك أماكن مغلقة ياما تكون كدا من وجهة نظرك متحبكشى
طبعا فيه بنات بتكون شطورة وذكية وبتفهم إنى دى حوارات تعبانة وأن دا مش وش جواز وفيه اللى بتضعف بسبب الوعود أو بسبب الاسلوب الشيطانى لابليس افندى اللى بيكون فى نظرات الواد اللى بتحبه اللى بيصورها أن اللى قدامها مهند
وفى اللى فعلا بتكون أبيض يا ورد وأن كانت الحالة دى قلت قوى فى مجتمعنا لان التكنولوجيا الحديثة مش سايبة حاجة صراحة
المهم يا جماعة مش عيب خالص أنك تكون سنجل بس أوعى موقف أو تجربة معينة تخليك سنجل علطول
الوحدة وحشة برضه قووووى متخليش العمر يجرى بيك عشان قدام هتندم وفى نفس الوقت أوى تتسرع فى جواز أو تبقى شغال كل شوية قصة حب وكأن قلبك مساكن شعبية اهدى شوية يا حاج الله يكرمك عشان قلبك كدا هيفرقع من الغيظ منك و بنصح كل الشباب والبنات اللى فى سنى بعد تجربة شخصية سابقة فى الزواج وعارف أن فى ناس ممكن تختلف معايا كتير لكن هقول نصايح مهمة هتوفر عليكم خسائر ووجع دماغ كتير ممكن يفضل سنين وسنين وأسمعها وأنت حر تعمل بيها أو لا
أولا أوعى تتسرع وتدى قلبك لحد قبل ما تعرفه كويس ولازم تحكم عقلك وقلبك سوا الاتنين مع بعض بس عقلك الاول وتسمع كلام ونصائح اللى أكبر منك مش عيب خالص ومش بقولك امشى بدماغ حد
بس اسمع كويس من كذا حد من اللى سبقوك نفس التجربة اللى بتعشها
والنصيحة اللى بأكد عليها قوى موضوع زواج الشباب وهو صغير السن للى ظروفهم بتسمح ليهم بكدا أيوه هتقلى دا إنقاذ ليه من الفتنة ولما هيتجوز هيعقل وكلام من دا لكن صراحة الشباب فى السن دا بيكون مفيش نضوج ومفيش خبرة فى فن إدارة بيت ناجح ومش عاوز يسمع كلام حد وبتلاقى عيال بيخلفوها عيال
طبعا دا مش للتعميم خالص ولكن إنتشار حالات الطلاق اليومية خاصة من جيل الشباب الصغير دليل كبير على صحة كلامنا
لكن خليك وسطى مش تقول أنك قررت نهائيا ورسميا التخلى عن المشاعر العاطفية واللجوء لعالم سمسم قصدى عالم سنجل ولا فى الوقت نفسه تتجوز وانت فى أوائل العشرينات لمجرد أنك حبيت أو عاوز تجوز أو تجوزى وخلاص
مينفعشى ياجماعة الجواز مش لعبة -لان ممكن تخلفوا أولاد ويحصل طلاق وتكونوا كدا شردتوا العيال معاكم وعقدوتهم فى عشتهم وتلاقى الواد المفعوس اللى أنفصل أمه عن أبيه يقولك (انا سنجل وأبويا وأمى سنجل ) ويعملها أغنية من كلماته وألحانه وصوته اللى ممكن الواحد بسببه يعيش تلوث سمعى أخر صيحة
بتمنى تكون الرسالة وصلت لكل اللى حابيين يعيشوا معانا ويشرفونا موقتا فى عالم سنجل وبأمر الله أكيد أحنا كمان مش هنعيش سنجل علطول ولا هنتعقد مهما حصل لان صوابعنا مش زى بعضها والحياة مش بتقف على حد لكن التجارب والحياة بتعلم كتير أن الواحد ما يتسرع فى أى قرار يخده ويستعين دائما بالله ثم بأصحاب الخبرات مش لازم يعيش الاخطاء نفسها عشان يتعلم
أشكركم وبامر الله ربنا يكرمكم جميعا وتلاقوا ولاد وبنات الحلال وكل واحد تتفك سنجلته بعد ما يظبط حاله ويصبح أسعد واحد فى الدنيا بامر الله
