قضي الحب الذي فيه تستفتيان

بقلم ڨيثارة الشعر ياسمين عبدالعزيز

انتو ليه عاوزين فتاوى ومهرجان ؟
انتو ليه عاملين لي دوشة من جنان
كل واحد منكو عارف
إن موج البحر جارف
والمحيط مليان حيتان
هي دي عاوزة فتاوى؟
عاوزة شيخ ياخد إتاوة
والا عضو في برلمان
احنا ليه دايما نعقد كل حاجة ؟
رغم إن الحق واضح
ليه نجادل في سماجة
والدليل فخاّره ناضح
والحكاية فصحى جدا
ليه نروح للترجمان
انتو يا ولاد الحلال
اليمين هو اليمين
والشمال هو الشمال
حاجة واضحة في كل دين
ليه نغير في الحقيقة
والحرام يصبح حلال؟
كل غشاش أو حرامي
جاي لي يطلب غرامي
عاوز الفتوى المقاس
زي ترزي يبيع.. يفصل 100 (لباس)
والجميع ع العدل داس
جاي لي و حروفه وارمة
والدموع عاملة التباس
جاي عاوز من ضميري رغيف شاورمة
والأساس
جاي يسرق حد تاني من الأساس
ماسك القرآن في إيده
واخد الإنجيل قياس
قال وايه ؟
واقف على خطوط التماس
يا جماعة
كل معنى الحب ولى من زمان
كل أفكارنا بضاعة
احنا بنتاجر حنان
كل ثانية وكل ساعة
كام ضحية ألعبان؟
قضي الحب الذي فيه تستفتيان

رأيك يهمنا

عن admin

admin
المشرف العام على موقع العالم الحر

شاهد أيضاً

روبابيكيا

رأيك يهمنا

اترك تعليقاً

لن يتم نشر عنوان بريدك الإلكتروني.